പോഷകസമൃദ്ധമായ ഭക്ഷണം – ഗർഭിണികൾക്ക്‌
പോഷകസമൃദ്ധമായ ഭക്ഷണം
പോഷകസമൃദ്ധമായ ഭക്ഷണം എല്ലാവര്ക്കും വേണ്ടുന്ന ഒരു അവശ്യ ഘടകം തന്നെയാണ്. എന്നാൽ അധികം ആരും ആ കാര്യത്തിൽ ശ്രദ്ധ നൽകാറില്ല എന്ന് മാത്രം. അതുപോലെ തന്നെയാണ് ഗര്ഭിണികളുടെയും മുലയൂട്ടുന്ന അമ്മമാരുടെയും കാര്യം. എന്താണെന്നാൽ അവർക്കും പോഷകസമൃദ്ധമായ ഭക്ഷണം ആവശ്യമാണ്. ഗർഭിണികളുടെ ഉള്ളിലുള്ള കുഞ്ഞുവാവയ്ക്കും മുലകുടിക്കുന്ന കുഞ്ഞുങ്ങൾക്കും വളർച്ചയ്ക്കാവശ്യമായ പോഷകങ്ങൾ ലഭിക്കുന്നത് അമ്മമാർ വഴിയാണ്.
കഴിക്കാം പോഷകസമൃദ്ധമായ ഭക്ഷണം
ഗര്‍ഭിണികള്‍ നന്നായി ആഹാരം കഴിക്കണം. പക്ഷേ, എന്തു കഴിക്കണമെന്നുംഎങ്ങനെ കഴിക്കണമെന്നും വ്യക്‌തമായ ധാരണയുണ്ടാവില്ല. ഭക്ഷണകാര്യത്തില്‍ ഗര്‍ഭിണികള്‍ ശ്രദ്ധിക്കേണ്ട കാര്യങ്ങൾ ഒരുപാടാണ്.
ഗര്‍ഭിണി ഭക്ഷണം കഴിക്കുന്നത്‌ ഒരാള്‍ക്കു വേണ്ടിയല്ല. രണ്ടു പേര്‍ക്കു വേണ്ടിയാണ്‌. അതിനാല്‍ ഗര്‍ഭകാല ആഹാരക്രമം പോഷകസമ്പുഷ്‌ടമായിരിക്കണം. എന്നാൽ കണ്ണില്‍ കണ്ടെതെല്ലാം വാരിവലിച്ച്‌ കഴിക്കണമെന്ന്‌ അതിന്‌ അർഥമില്ല. ശരീരം ക്രമാതീതമായി വണ്ണവയ്‌ക്കുന്നതരത്തിലുള്ള അമിത കൊഴുപ്പടങ്ങിയ വിഭവങ്ങള്‍, നെയ്യ്‌ ഇവ ചേര്‍ത്തു തയാറാക്കിയ വിഭവങ്ങള്‍ ഒഴിവാക്കണം. ഗര്‍ഭിണി ആഹാരം കഴിക്കുന്നത്‌ ഉദരത്തില്‍ വളരുന്ന പൊന്നോമനയ്‌ക്കു കൂടി വേണ്ടിയാണെന്ന തോന്നല്‍ ഉള്ളിലുണ്ടാകുമ്പോള്‍ ഭക്ഷണകാര്യത്തില്‍ ശ്രദ്ധിക്കാതിരിക്കാന്‍ കഴിയില്ല. ഗര്‍ഭസ്‌ഥ ശിശുവിന്റെ വളര്‍ച്ചയ്‌ക്ക് ആവശ്യമായ പോഷകങ്ങള്‍ ലഭിക്കുന്നത് അമ്മ കഴിക്കുന്ന ആഹാരത്തിലൂടെയാണെന്ന്‌ മറക്കാതിരിക്കുക.
ഗര്‍ഭധാരണത്തിനുമുമ്പേ ശ്രദ്ധ
ഒരു സ്‌ത്രീ ഗര്‍ഭിണിയാകുന്നതിനുമുമ്പ്‌ തന്നെ ശാരീരികമായും മാനസികമായും തയാറെടുത്തു തുടങ്ങണം. നല്ല ആരോഗ്യവും ബുദ്ധിശക്‌തിയുമുള്ള കുഞ്ഞ്‌ പിറക്കാൻ ഈ തയാറെടുപ്പ്‌ സഹായിക്കും.
അമിതവണ്ണമുള്ളവർ ശരീരഭാരം കുറയ്‌ക്കണം. ഇത്‌ പ്രസവം സുഖകരമാക്കാനും ഗര്‍ഭകാല അസ്വസ്‌ഥതകള്‍ കുറച്ചു നിര്‍ത്താനും സഹായിക്കും. എന്നാല്‍ ശരീരം വളരെ മെലിഞ്ഞിരിക്കുന്നതും നന്നല്ല. അങ്ങനെയുള്ളവര്‍ ഭക്ഷണരീതി ക്രമീകരിച്ച്‌ ശരീരഭാരം വര്‍ധിപ്പിക്കണം. ബി.എം.ഐ 20 – 26 നും ഇടയിലാകുന്നതാണ്‌ ഉത്തമം.
പ്രോട്ടീന്‍ സമൃദ്ധമായ ഭക്ഷണം
പോഷക ഗുണമേറയുള്ള ആഹാരങ്ങള്‍ വേണം ഗര്‍ഭകാലത്ത്‌ സ്‌ത്രീകള്‍ ശീലമാക്കാന്‍. പ്രോട്ടീന്‍ സമൃദ്ധമായ ആഹാരമാണ്‌ ഈ സമയത്ത്‌ ഏറ്റവും പ്രധാനം. ഗര്‍ഭധാരണത്തിന്റെ ആദ്യമാസങ്ങളില്‍ പെട്ടെന്ന്‌ ദഹിക്കുന്ന ഏതുതരം ഭക്ഷണവും കഴിക്കാവുന്നതാണ്‌. പഴങ്ങള്‍, പച്ചക്കറികള്‍, ഇലക്കറികള്‍, പഴച്ചാറുകള്‍ തുടങ്ങിയവക്ക്‌ കൂടുതല്‍ മുന്‍ഗണന നല്‍കണം. ഗര്‍ഭകാലത്ത്‌ മിക്കവരെയും അലട്ടുന്ന പ്രശ്‌നമാണല്ലോ മലബന്ധം. ഇത്‌ ഒഴിവാക്കാന്‍ ധാരാളം നാരുകള്‍ അടങ്ങിയ ഭക്ഷണം കഴിക്കണം (പഴങ്ങള്‍, ഇലക്കറികള്‍, പച്ചക്കറികള്‍ തുടങ്ങിയവ).
നാലാംമാസം മുതൽ:
ഗര്‍ഭിണിക്ക്‌ നാലാം മാസമാകുന്നതോടെ ഛര്‍ദി കുറയുന്നു. അതോടെ വിശപ്പ്‌ കൂടാം. ആ സമയത്ത്‌ കൂടുതല്‍ വിറ്റാമിനടങ്ങിയ ഭക്ഷണം വേണം കഴിക്കാന്‍. സാധാരണ സ്‌ത്രീകള്‍ക്ക്‌ ആവശ്യമുള്ളതിലും അധികം വിറ്റമിനുകള്‍ ഗര്‍ഭിണിക്ക്‌ ആവശ്യമുണ്ട്‌.
- മാംസ്യം, കാത്സ്യം ഇവ കൂടുതലുള്ള ആഹാരങ്ങളാണ്‌ ഈ സമയത്ത്‌ പ്രാധാന്യം നല്‍കേണ്ടത്‌.
- ഇലക്കറികള്‍, കാബേജ്‌, കോളിഫ്‌ളവര്‍, തക്കാളി, നെല്ലിക്ക തുടങ്ങിയ പച്ചക്കറികള്‍ കൂടുതലായി ഉള്‍പ്പെടുത്താന്‍ ശ്രദ്ധിക്കണം.
- ഓരോ ദിവസവും ഓരോ വിഭവങ്ങള്‍ എന്ന രീതിയില്‍ ഇവ ഭക്ഷണത്തില്‍ ഉള്‍പ്പെടുത്താവുന്നതാണ്.
- ദിവസവും 8-10 ഗ്ലാസ്‌ വെള്ളമെങ്കിലും ഗര്‍ഭിണി കുടിക്കണം.
- ഗര്‍ഭകാലത്ത്‌ ഉണ്ടാകുന്ന നെഞ്ചെരിച്ചില്‍ ഒഴിവാക്കാന്‍ ആഹാരം കുറഞ്ഞ അളവില്‍ കൂടുതല്‍ തവണകളായി കഴിക്കുന്നതാണ്‌ നല്ലത്‌.കൂടുതല്‍ സമയം വിശപ്പ്‌ പിടിച്ചുവച്ചശേഷം അമിത അളവില്‍ ഭക്ഷണം കഴിക്കുന്നത്‌ ആരോഗ്യകരമല്ല.
- ഭക്ഷണം കഴിക്കുമ്പോഴും വളരെയധികം ശ്രദ്ധിക്കണം. ധൃതി പിടിക്കാതെ സാവകാശം ചവച്ചരച്ചു വേണം കഴിക്കാന്‍.
- കഴിച്ചു കഴിഞ്ഞാല്‍ ഉടന്‍ കിടക്കുന്ന ശീലവും നല്ലതല്ല. ഇത്‌ ദഹനക്കുറവിന്‌ കാരണമാകാം.
- രാത്രി കിടക്കുന്നതിന്മുമ്പ്‌ ഒരു ഗ്ലാസ്‌ ചെറു ചൂടുള്ള പാല്‍ കുടിക്കുന്നത്‌ സുഖകരമായ ഉറക്കം പ്രദാനം ചെയ്യും.
- അച്ചാറുകള്‍, ഉണക്കമീന്‍ തുടങ്ങിയവ അധികം ഉപയോഗിക്കാതിരിക്കുക.
- സോഫ്‌റ്റ് ഡ്രിങ്ക്‌സ്, ചായ, കാപ്പി, ഫ്രിഡ്‌ജില്‍വച്ച ആഹാരങ്ങള്‍, സവാള, വെളുത്തുള്ളി, അധികം എരിവടങ്ങിയ ആഹാരങ്ങള്‍ എന്നിവയുടെ അമിത ഉപയോഗം നല്ലതല്ല.
കൃത്രിമ ആഹാരം ഒഴിവാക്കുക
ഗര്‍ഭകാലത്ത്‌ ഹോട്ടല്‍ ഭക്ഷണത്തോട്‌ അമിത താല്‌പര്യം തോന്നിയേക്കാം. എന്നാല്‍ ഫാസ്‌റ്റ് ഫുഡ്‌ ഭക്ഷണം പതിവായി കഴിക്കുന്ന ശീലം ഒഴിവാക്കണം. ശരീരത്തില്‍ കൊളസ്‌ട്രോളിന്റെ അളവ്‌ ക്രമാതീതമായി വര്‍ധിക്കാനും അമിതവണ്ണത്തിനും ഇത്‌ കാരണമാകാം. ഇത്‌ കുഞ്ഞിന്റെ ആരോഗ്യത്തിനുതന്നെ ഭീക്ഷണിയാകാം.
രാവിലെയും വൈകുന്നേരങ്ങളിലും പഴങ്ങളും, പച്ചക്കറികളും, പഴച്ചാറുകളും കഴിക്കുന്നത്‌ വിശപ്പ്‌ അമിതമാകുന്നത്‌ തടയും. മാത്രമല്ല അമ്മയുടെയും കുഞ്ഞിന്റെയും ആരോഗ്യരക്ഷയയ്‌കാവശ്യമായ വിറ്റാമിന്‍, ഫോളിക്‌ ആസിഡ്‌ എന്നിവയും ഇതില്‍നിന്നു ലഭിക്കുന്നു.
പോഷകസത്തുള്ള ആഹാരങ്ങള്‍
- ഇരുമ്പ്‌ : ഇലക്കറികള്‍, ഈന്തപ്പഴം, ഉണക്കമുന്തിരി, ശര്‍ക്കര, മാംസം, പയര്‍വര്‍ഗങ്ങള്‍
- കാത്സ്യം : പാല്‍, തൈര്‌, മോരുവെള്ളം, മത്സ്യം, പയര്‍വര്‍ഗങ്ങള്‍, ഇലക്കറികള്‍, റാഗി, ചീസ്‌
- മാംസ്യം : പാല്‍, മുട്ട, മാംസം, മത്സ്യം, പരിപ്പ്‌, പയര്‍വര്‍ഗങ്ങള്‍,
സോയാബീന്‍, ചീസ്‌, പനീര്‍
ഗർഭിണികൾ ഒഴിവാക്കേണ്ട ഭക്ഷണങ്ങൾ
ഗർഭിണികൾ കഴിക്കേണ്ട ഭക്ഷണം
ഗർഭിണികൾ ഈന്തപ്പഴം കഴിച്ചാൽ
ഗർഭിണികൾ കഴിക്കേണ്ട പഴങ്ങൾ
ഗർഭകാല ഭക്ഷണം
ഗർഭിണികൾ ആപ്പിള് കഴിച്ചാൽ
ഗർഭിണികൾ കഴിക്കാന്‍ പാടില്ലാത്ത ഭക്ഷണം
Related Topic ;
കുഞ്ഞുങ്ങളുടെ ആഹാരക്രമം, ചില അറിവുകൾ
കുട്ടികളിലെ പനി – അമ്മമാർ അറിഞ്ഞിരിക്കേണ്ടതെന്തെല്ലാം !
കൂടുതൽ അറിയാൻ: മലയാളം ആരോഗ്യ ടിപ്സ്
